Corff Llywodraethol i gyfarfod yng Nghasnewydd ym mis Medi

Bydd Corff Llywodraethol yr Eglwys yng Nghymru yn cyfarfod y mis hwn ar gyfer cyfarfod cynhwysfawr dros ddau ddiwrnod yng Nghanolfan Gynadledda Ryngwladol (ICC) Casnewydd ar 9 a 10 Medi. Bydd y cyfarfod yn dod â 143 o glerigwyr a chynrychiolwyr lleyg etholedig ynghyd o bob un o'r chwe esgobaeth yng Nghymru.

Bydd yr agenda yn agor gydag Anerchiad Llywyddol allweddol gan Archesgob Cymru, y Parchedicaf Cherry Vann, a fydd yn gosod naws trafodaethau'r cyfarfod ymhlith yr aelodau.

Bydd yr aelodau'n trafod cynnig aelodau preifat pwysig a gynigiwyd gan yr Hybarch Andy Grimwood ac a eiliwyd gan Ms Anna Cory. Mae'r cynnig yn galw ar i Gorff y Cynrychiolwyr gyflwyno dadansoddiad ariannol a chyllidebol ym mis Ebrill 2027 ynghylch cydraddoldeb cyflogau a phensiynau â'r Eglwys yng Nghymru â'r Eglwys yn Lloegr, ac yna gyfres o opsiynau ar gyfer cynllun tai ymddeol cynaliadwy ac urddasol i glerigwyr ym mis Medi 2027.

Trwy gydol y sesiynau, bydd y rhai sy'n bresennol yn clywed gan siaradwyr allanol, gan gynnwys y Parchedig Ganon Dr Duncan Dormor, Ysgrifennydd Cyffredinol Cymdeithas Unedig Partneriaid yn yr Efengyl (USPG), a Dr Helen Paynter, Cyfarwyddwr y Ganolfan ar gyfer Astudio'r Beibl a Thrais yng Ngholeg Bedyddwyr Bryste. Bydd hi'n traddodi anerchiad i'r Corff Llywodraethol am genedlaetholdeb Cristnogol a chynnydd y dde eithafol.

Bydd materion llywodraethu hefyd yn ganolog, gyda thrafodaethau ar adroddiadau gan Fainc yr Esgobion, Corff y Cynrychiolwyr a'r Pwyllgor Sefydlog, sy'n cynnig rhai diwygiadau i Gyfansoddiad yr Eglwys yng Nghymru ac i'r Polisi Diogelu. Bydd trafodaeth hefyd ar y bwriad i fabwysiadu'r bennod ddiweddaraf o'r Cod Ymddygiad ar gyfer clerigwyr a gweinidogion lleyg trwyddedig, sy'n canolbwyntio ar uniondeb ariannol.

Yn ogystal â'r sesiynau busnes, bydd y cyfarfod yn cynnwys gwasanaethau addoli, gan gynnwys dathliad o'r Cymun Bendigaid. Ar noson 9 Medi, bydd y Corff Llywodraethol yn teithio i Gadeirlan Casnewydd ar gyfer Gosber Corawl, gwasanaeth a fydd yn cynnwys Synod Sanctaidd lle bydd etholiad Esgob newydd Bangor yn cael ei gadarnhau'n swyddogol.

Bydd y digwyddiadau ar agor i'r cyhoedd ac fe ellir eu dilyn ar-lein trwy ddolen ffrydio byw sydd ar gael ar wefan yr Eglwys yng Nghymru yn www.churchinwales.org.uk ac ar ei sianel YouTube swyddogol yn https://www.youtube.com/user/churchinwales