Datganiad gan yr Eglwys yng Nghymru ar Andrew Robinson

Mae Andrew Robinson, offeiriad wedi ymddeol o'r Eglwys yng Nghymru, wedi ymddangos yn Llys Ynadon Merthyr Tudful ar ôl cyfaddef troseddau yn ymwneud â delweddau anweddus o blant.

Cyfaddefodd y troseddau canlynol:

• 13 achos o feddiant/gwneud delweddau categori A o blant
• 20 achos o feddiant/gwneud delweddau categori B o blant
• 196 achos o feddiant/gwneud delweddau categori C o blant
• 327 achos o feddiant/gwneud delweddau gwaharddedig o blant

Cafodd ddedfryd o 12 wythnos o garchar wedi'i gohirio am 2 flynedd. Mae hefyd yn destun gorchymyn Atal Niwed Rhywiol am 2 flynedd.

Ordeiniwyd Andrew Robinson yn 1995 a gwasanaethodd ei weinidogaeth gyfan yn esgobaeth Abertawe ac Aberhonddu. Bu'n Offeiriad â Gofal Bywoliaeth Llanfeugan gyda Llanthetty gyda Llansantffraed-juxta-Wysg a Bywoliaeth Llanfrynach a Chantref gyda Llanhamlach cyn iddo ymddeol yn 2014. Roedd ganddo ganiatâd i weinyddu yn yr Esgobaeth o 2014 tan Ionawr 2024.

Pan ddaeth yr heddlu â'u hymchwiliad at sylw Tîm Diogelu'r Eglwys yng Nghymru ym mis Ionawr 2024, tynnwyd Caniatâd Andrew Robinson i Weinyddu yn ôl ar unwaith. Ar ôl i'r achos troseddol ddod i ben, bydd y mater yn cael ei gyfeirio at Dribiwnlys Disgyblu'r Eglwys yng Nghymru, a fydd yn ystyried camau priodol pellach.

Dywedodd llefarydd ar ran yr Eglwys yng Nghymru: "Mae'r rhain yn droseddau ffiaidd sy'n ecsbloetio ac yn hyrwyddo cam-drin plant yn rhywiol. Rydym yn condemnio'r ymddygiad hwn yn y termau cryfaf posibl ac rydym yn dal dioddefwyr y troseddau hyn yn ein gweddïau. Rydym yn ddiolchgar i'r heddlu ac i'n tîm diogelu am eu gwaith yn y mater hwn. Does dim lle i unrhyw fath o gamdriniaeth yn yr Eglwys yng Nghymru."

Rydym yn rhoi'r flaenoriaeth uchaf i ofal ac amddiffyniad plant a phobl agored i niwed yn ein cymunedau. I'r perwyl hwn rydym yn adolygu ein gweithdrefnau diogelu yn rheolaidd ac yn darparu hyfforddiant helaeth i staff a gwirfoddolwyr.

Rydym yn annog unrhyw un sydd â phryderon diogelu i gysylltu ag aelod o'n tîm drwy wefan yr Eglwys yng Nghymru:

• Gwefan: https://www.churchinwales.org.uk/en/safeguarding/reporting-safeguarding-concern/
• Ffôn: 02920 348200

Fel arall, mae Safe Spaces yn wasanaeth cymorth annibynnol am ddim, sy'n darparu gofod cyfrinachol, personol a diogel i unrhyw un sydd wedi cael ei gam-drin trwy eu perthynas ag Eglwys Loegr, yr Eglwys Gatholig yng Nghymru a Lloegr neu'r Eglwys yng Nghymru.

Gallwch gysylltu â'r tîm Mannau Diogel drwy:

• Gwefan: www.safespacesenglandandwales.org.uk
• Ffôn: 0300 303 1056 (ffôn ateb ar gael y tu allan i'r oriau agor)
• E-bost: safespaces@firstlight.org.uk