Gwasanaethau Ymadael Blwyddyn 6 yng Nghadeirlan Casnewydd

Ymgasglodd bron i 550 o ddisgyblion Blwyddyn 6 o bob un o'r 15 ysgol gynradd ar draws Esgobaeth Mynwy yn Eglwys Gadeiriol Casnewydd i ddathlu carreg filltir bwysig, wrth iddynt baratoi i adael yr ysgol gynradd a dechrau cam nesaf eu taith addysgol.

Rhoddodd y Gwasanaethau Ymadael arbennig hyn a gynhaliwyd dros ddau ddiwrnod, gyfle i ddisgyblion fyfyrio ar eu hamser yn yr ysgol gynradd, diolch am bopeth yr oeddent wedi'i gyflawni, gweddïo dros y dyfodol, a dathlu gyda'i gilydd trwy gerddoriaeth, canu a dawnsio.

Arweiniwyd y gwasanaethau gan yr Archesgob Cherry, a gydnabu, er bod symud i'r ysgol uwchradd yn antur gyffrous, y gall hefyd ddod â theimladau o bryder, tristwch ac ansicrwydd a allai fod yn "byrlymu" o dan yr wyneb. Atgoffodd y disgyblion o'r foment pan ymddangosodd Iesu i'w ddisgyblion ar ôl ei atgyfodiad. Er eu bod wedi'u dychryn ac yn ansicr, cawsant eu cyfarch gyda'r geiriau tawel: "Tangnefedd i  chi." Trwy'r geiriau hyn, cynigiodd Iesu gysur, dewrder a gobaith iddynt, gan eu hatgoffa nad oedd angen iddynt ofni.

Fel atgof parhaol o'r neges hon, derbyniodd pob disgybl nod tudalen lledr wedi'i ysgythru gyda'r geiriau: "Heddwch gyda chi – Tangnefedd i chwi."

Roedd y gwasanaethau yn llawn eiliadau teimladwy wrth i ddisgyblion fyfyrio ar atgofion gwerthfawr o deithiau ysgol, cyfeillgarwch, goresgyn heriau a chefnogaeth eu hathrawon. Roedd yr awyrgylch yn un o lawenydd a dathlu, gyda'r tîm iSingPOP yn arwain caneuon a dawnsfeydd egnïol a oedd yn llenwi'r eglwys gadeiriol gyda cherddoriaeth a chwerthin.

Dywedodd Clare Werrett, Pennaeth Addysg Esgobaeth Mynwy: "Roedd yn bleser bod yn rhan o'r dathliadau hyn a gweld yr eglwys gadeiriol yn llawn plant yn canu, dawnsio a myfyrio ar eu hamser yn yr ysgol gynradd. Rydym yn hynod falch o bopeth maen nhw wedi'i gyflawni ac yn dymuno pob bendith iddynt wrth iddynt ddechrau'r bennod newydd gyffrous hon."

Rydym yn anfon pob un o'n disgyblion Blwyddyn 6 i'r bennod nesaf hon gyda'n cariad, ein gweddïau a phob bendith ar gyfer y dyfodol.