Arweinwyr ffydd yn llofnodi datganiad cyhoeddus o undod cyn etholiadau'r Senedd

Ymgasglodd arweinwyr prif gymunedau ffydd Cymru yn y Deml Heddwch ym Mharc Cathays yng Nghaerdydd ddydd Llun i lofnodi datganiad cyhoeddus o undod wrth inni baratoi ar gyfer etholiadau'r Senedd.

Wrth gynrychioli'r Eglwys yng Nghymru, anerchodd Archesgob Cymru, y Parchedig Cherry Vann, y cyfarfod yn Siambr Cyngor y Deml Heddwch, a fynychwyd gan gynrychiolwyr o'r holl brif gymunedau ffydd.

Dywedodd: "Rydym wedi ymrwymo i weithio gyda'n gilydd mewn partneriaeth er lles ein cymdogaethau, er lles ein gwlad ac er lles ein byd. Mae'n gallu teimlo'n llethol pan edrychwn o gwmpas ar gyflwr y byd, a gallwn deimlo fel na allwn wneud unrhyw wahaniaeth. Ond nid wyf yn credu mewn gwirionedd bod hynny'n wir. Oherwydd mae pob gweithred o gyfeillgarwch, pob gweithred o undod unigol, pob gair caredig, pob gwên i ddieithryn yn newid pethau. Mae'n gwneud gwahaniaeth a dyna rwy'n gobeithio y gallwn ymrwymo i'w wneud yn unigol ac wrth i ni fynd â'r digwyddiad hwn allan i'n cymunedau yn nes ymlaen."

Wrth i Gymru fynd i mewn bennod wleidyddol newydd, a'r byd yn wynebu dyfodol ansicr o ganlyniad yn sgil effeithiau rhyfel, newid hinsawdd, ac aflonyddwch cymdeithasol, rydyn ni, sydd wedi llofnodi isod, yn ymrwymo i weithio dros Gymru sydd wedi'i hadeiladu ar ddelfrydau cydfodolaeth heddychlon, cymdogrwydd a rhyddid addoli.

Rydym yn gweddïo ac yn hiraethu am genedl lle gall pawb ffynnu a lle nad oes angen ofni neb; cenedl wedi'i hadeiladu ar egwyddorion sylfaenol urddas dynol, a'r hawl i rannu'n deg yn ein holl gyfoeth cyffredin waeth beth fo'u cysylltiad crefyddol, rhywedd, ethnigrwydd, a statws economaidd. Rydym yn clywed cri'r tlawd a'r rhai sydd wedi’u hymylu ac yn gwrthod pob galwad am gasineb a dad-ddyneiddio.

Fel pobl o ffydd, rydym yn ymrwymo i weithio mewn partneriaeth ag eraill sydd ag ewyllys da yn y llywodraeth, cymdeithas sifil, ac ar lefel y gymuned leol i helpu i wireddu delfrydau o'r fath gan gydnabod bod iechyd cenedl yn dibynnu ar sefydliadau, perthnasoedd a mentrau ar lawr gwlad.

Yn olaf, rydym yn mynegi undod a chyfeillgarwch â'n gilydd, gan gydnabod bod gennym wahaniaethau dwfn o ran argyhoeddiadau, ond eto’n parhau i fod yn unedig trwy ddelfrydau tosturi, cariad a gwasanaeth. Lle nad ydym yn cytuno, rydym yn ymrwymo i wneud hynny’n hael a chyda pharch.

Rydym yn galw ar eraill yng Nghymru i ymuno â ni yn yr ymrwymiadau hyn ac yn enwedig y rhai sy'n ceisio cael eu hethol i'r Senedd.

Rydym yn ymrwymo i weddïo dros y genedl a phob cynrychiolydd etholedig ac arweinydd.