Corff Llywodraethol yr Eglwys yng Nghymru yn pleidleisio i wneud darpariaeth barhaol ar gyfer bendithion o'r un rhyw

Heddiw, pleidleisiodd Corff Llywodraethol yr Eglwys yng Nghymru i wneud darpariaeth barhaol ar gyfer bendithion eglwysig i gyplau mewn Priodasau Sifil a Phartneriaethau Sifil o'r un rhyw.

Bum mlynedd yn ôl, ar ôl penderfynu ei bod yn "anghynaliadwy yn fugeiliol" i'r Eglwys beidio â gwneud unrhyw ddarpariaeth ffurfiol i'r rhai mewn perthnasoedd o'r un rhyw ymrwymedig, cymeradwyodd y Corff Llywodraethol wasanaeth bendithio am gyfnod arbrofol o bum mlynedd, a fydd yn dod i ben ym mis Medi eleni.

Ddoe a heddiw, yn ei gyfarfod yn Llandudno, trafododd y Corff Llywodraethol gynnig i wneud y ddarpariaeth yn barhaol trwy ymgorffori defod ar gyfer bendithio priodasau a phartneriaethau o'r un rhyw yn y Llyfr Gweddi Gyffredin.

Er mwyn i’r mesur basio, roedd angen mwyafrif o ddwy ran o dair o bob un o'r Urddau sy'n ffurfio'r Corff Llywodraethol: Esgobion, Clerigwyr a Lleygwyr. Pleidleisiodd y 5 Esgob o blaid. Pleidleisiodd y clerigwyr 32 – 7 o blaid, gyda 5 yn ymatal, a'r lleygwyr 48 – 8 o blaid, gyda 2 yn ymatal.

Gallwch ddarllen y litwrgi arfaethedig yma, a'r gwelliannau a gynigiwyd gan aelodau'r Corff Llywodraethol yma.

Nid oes gan yr Eglwys yng Nghymru ddarpariaeth o hyd i briodi cyplau o'r un rhyw. Fodd bynnag, ym mis Tachwedd 2025, ar ôl sawl mis o ymarferion gwrando gofalus, cyhoeddodd Esgobion yr Eglwys lythyr bugeiliol yn nodi bod y broses wedi dangos mwyafrif "o blaid y farn mai dyma'r amser iawn i gynnig priodas gyfartal."

Bydd cynigion pellach yn cael eu cyflwyno ym mis Ebrill 2027 i ganiatáu i gyfraith y wladwriaeth a'r Eglwys gael eu newid i ganiatáu priodas gyfartal yn yr Eglwys yng Nghymru.

Wrth siarad am y bleidlais heddiw, dywedodd y Parchedicaf Cherry Vann, Archesgob Cymru: "Hoffwn ddiolch i bawb am y modd y cynhaliwyd y ddadl hon - yn bwyllog, a chyda pharch i'r ddwy ochr. Mae Mainc yr Esgobion a minnau'n cydnabod bod hwn yn fater y mae pobl yn dal argyhoeddiadau cryf yn ei gylch. Rydym am i bawb allu goleddu eu barn gyda gonestrwydd heb golli golwg ar ddelwedd Duw sy'n trigo ym mhob un ohonom. Rydym am adeiladu eglwys a all wneud lle i'n gilydd beth bynnag fo'n safbwyntiau gwahanol."

Cynhaliwyd y drafodaeth a'r bleidlais ail ddiwrnod cyntaf cyfarfod y Corff Llywodraethol yn Venue Cymru yn Llandudno. Mae'r darllediad byw ar gael i'w wylio ar-lein yma: