Archesgob Cymru yn annog gweddi a chymorth ymarferol i Feneswela

Mae Archesgob Cymru yn annog pobl i gefnogi'r rhai sydd wedi'u heffeithio gan y daeargrynfeydd dinistriol yn Venezuela trwy gymorth ymarferol a gweddi.

Mae mwy na 1,700 o bobl wedi cael eu lladd, ac mae miloedd lawer wedi eu hanafu a'u dadleoli gan y daeargrynfeydd a darodd ar Fehefin 24ain.

Mae Cymorth Cristnogol. partner elusennol yr Eglwys yng Nghymru, eisoes yn helpu'r ymdrech i helpu’r dioddefwyr.

Dywedodd Mari Tutesigensi, Pennaeth Cymorth Cristnogol yng Nghymru:

"Mae angen mawr am bethau sylfaenol fel blancedi, tyweli, citiau hylendid, dŵr, bwyd, a chymorth seicolegol. Mae pobl yn delio â cholled fawr, wedi colli anwyliaid, cartrefi, pob dim o fewn eiliadau... Nid ydych yn bell oddi wrthym. Mae’r byd hwn yn perthyn i bob un ohonom. Dyma’r amser i roi ein dinasyddiaeth fyd-eang ar waith. Rwy’n annog pobl Cymru, fel yr wyf yn annog pobl ym mhobman, i weithredu fel dinasyddion y byd heddiw wrth i ni gofio ein brodyr a’n chwiorydd yn Venezuela."

“Mae ein partneriaid ffydd yn Venezuela eisoes yn yr ardaloedd a gafodd eu taro gwaethaf. Rydym yn rhyddhau cyllid brys fel eu bod yn gallu darparu dŵr glân, bwyd, pecynnau iechyd a lloches i deuluoedd sydd wedi colli popeth. Ac rydym yn apelio am gefnogaeth bellach i rymuso eu hymateb dros y dyddiau ac wythnosau nesaf a chefnogi teuluoedd sydd wedi colli popeth.”

Dywedodd Archesgob Cymru, y Parchedicaf Cherry Vann:

"Ni allai neb beidio â brawychu wrth weld y dioddefaint trasig a achoswyd gan y daeargrynfeydd dinistriol yn Venezuela.

“Mae ein calonnau yn brifo dros y dioddefwyr a'u teuluoedd, ac rydym yn cadw cenedl Venezuela yn ein gweddïau, gan ofyn i Dduw nerthu breichiau’r achubwyr a'r gweithwyr cymorth a chysuro a gwarchod y dioddefwyr. Fel rhan o'n cenhadaeth fel Cristnogion, rydym hefyd yn annog cefnogaeth ymarferol ac ariannol i'n hasiantaethau fel Cymorth Cristnogol sy'n gweithio i helpu pawb sydd wedi'u heffeithio gan y trychineb. Prin y gallai eu gwaith i ddod â gobaith i bobl yn yr amgylchiadau mwyaf torcalonnus fod yn fwy hanfodol."

Anogodd yr Archesgob Cherry eglwysi i gefnogi'r apêl ddydd Sul ac i wahodd pobl i weddïo'r weddi arbennig a ddarperir gan Christian Aid:

Dduw cariad.

Wrth i’r ddaear ysgwyd a chartrefi ddymchwel yn llwch, cydia yn ein calonnau, Arglwydd.

Wrth i ôl-gryniadau achosi i’r ofn barhau, cydia yn ein calonnau, Arglwydd.

Wrth i alar ysgwyd teuluoedd i’r byw, cydia yn ein calonnau, Arglwydd.

Anfon ein dwylo a'n traed i gynorthwyo mewn unrhyw ffordd wrth i’n brodyr a’n chwiorydd fyw drwy hyn yn Venezuela.

Boed inni Arglwydd ymateb mewn ffordd sy’n cydweddu â’th ras a’th gariad di. Amen.