Gweddi dros Afon Gwy ar Ddiwrnod Amgylchedd y Byd

Roedd eglwysi yng nghanolbarth Cymru yn dathlu Diwrnod yr Amgylchedd y Byd yn gynharach y mis hwn gyda gwasanaeth bendith ar lannau Afon Gwy yn Llanelwedd. Casglodd Ardal Weinidogaeth Irfon, Gwy ac Edw a Cytun bump ar hugain o bobl - eglwyswyr a phobl nad ydynt yn eglwyswyr fel ei gilydd - i weddïo, clywed yr ysgrythur, bendithio'r afon ac ymrwymo i weithio gydag eraill tuag at ei hadfer.

"Mae cyflwr Afon Gwy yn destun pryder i lawer," meddai'r Parchedig Ganon Mark Beaton, arweinydd ardal y weinidogaeth.

"Mae achosion cyfreithiol, protestiadau, gwyliau ac ymgyrchoedd yn parhau. Roedden ni'n teimlo bod gan yr Eglwys rywbeth i'w ddweud am ofalu am greadigaeth Duw."

Denodd yr achlysur ambell i gipolwg syn gan y beicwyr y tu allan i’r Farmhouse Grill cyfagos wrth i’r orymdaith — rhai mewn coleri clerigol, un mewn gwisgoedd — wneud ei ffordd drwodd i lan yr afon.

"Mae cynlluniau eisoes yn cael eu llunio i ddychwelyd y flwyddyn nesaf," meddai Mark, "y tro hwn gyda baneri, drymiau a chanu."