Yswiriant Eglwysi a Neuaddau Eglwys o 1 Ionawr 2027

Mae Corff y Cynrychiolwyr wedi cytuno i dalu costau yswiriant eglwysi cadeiriol, eglwysi a neuaddau eglwys a reolir, o dan y Cyfansoddiad, gan bob Cyngor Ardal Gweinidogaeth/Cenhadaeth (MAC) neu Gabidwl Eglwys Gadeiriol.

O dan y Cyfansoddiad, mae pob MAC a Chabidwl yn gyfrifol am dalu premiwm yswiriant adeiladau o'r fath yn seiliedig ar amodau a thelerau polisi a sefydlwyd gan Gorff y Cynrychiolwyr. (Rheoliadau Adeiladwaith Eglwysig, Cymal 5).

Er mwyn cynyddu cymorth ariannol i Ardaloedd Gweinidogaeth a lleihau beichiau gweinyddol, mae Corff y Cynrychiolwyr wedi penderfynu talu cost y premiymau hyn o 1 Ionawr 2027.

Mae'r nodyn hwn yn ceisio esbonio'r goblygiadau a'r trefniadau ar gyfer gweithredu'r penderfyniad hwn trwy gyfres o Gwestiynau Cyffredin.

DS: Er symlrwydd, cyfeirir at bob Cyngor Ardal Gweinidogaeth/Cenhadaeth neu Gabidwl Eglwys Gadeiriol, fel ymddiriedolwyr lleol, fel MAC.

Cwestiynau Cyffredin

Pryd fyddwch chi'n dechrau talu'r premiwm?

Bydd Corff y Cynrychiolwyr yn dechrau talu'r premiwm ar gyfer blwyddyn premiwm 2027, ar gyfer polisïau sy'n cael eu hadnewyddu ar 1 Ionawr 2027.
Mae papurau adnewyddu yn cael eu cyhoeddi gan gwmni Ecclesiastical rai wythnosau cyn y dyddiad adnewyddu.
Disgwylir i MACs dalu unrhyw bremiwm ar gyfer blwyddyn premiwm 2026 yn uniongyrchol i Ecclesiastical.

Sut fyddwch chi'n trefnu’r taliad premiwm gyda'r cwmni yswiriant?

Mae Corff y Cynrychiolwyr yn trefnu talu'r premiwm ar gyfer yr holl bolisïau MAC sy'n cwmpasu eglwysi, eglwysi cadeiriol a neuaddau eglwys yn uniongyrchol i Ecclesiastical.
Bydd cyfanswm y premiwm a delir yn cael ei gyfrifo gan gyfanswm y premiymau ar gyfer pob Ardal Gweinidogaeth a'i heglwysi a neuaddau eglwys cyfansoddol. Bydd y premiwm ar gyfer pob Ardal Gweinidogaeth yn parhau i gael ei gyfrifo a bydd yn ymddangos ar bapurau adnewyddu, felly bydd gwerth y cymorth hwn i bob MAC yn dryloyw.

A fydd MAC yn dal i gael ei yswirio?

Bydd. Bydd pob polisi MAC presennol sy'n cwmpasu eglwysi, eglwysi cadeiriol a neuaddau eglwys yn parhau ar waith fel nawr, gan gynnwys yswiriant atebolrwydd.
Mae Corff y Cynrychiolwyr wedi'i yswirio ar y cyd ar bob polisi MAC nawr, a bydd hynny'n parhau.
Does dim newidiadau i sicrwydd yswiriant y polisi. Mae pwyllgorau eglwys lleol, gwirfoddolwyr a staff y MAC/Cabidwl wedi'u hyswirio dan bolisïau MAC presennol, a bydd hynny'n parhau.

Sut fyddwch chi'n trefnu i adnewyddu’r polisi blynyddol?

Bob blwyddyn yn yr hydref, mae Corff y Cynrychiolwyr yn cytuno ar y telerau cyffredinol ar gyfer adnewyddu'r polisïau. Yna, mae'r telerau hyn yn cael eu trosi i'r telerau penodol ar gyfer pob polisi MAC.
Yna, bydd yr holl adnewyddiadau polisi MAC penodol yn cael eu cyflwyno i bob cyswllt yn y MAC/Cabidwl cyn y dyddiad adnewyddu (1 Ionawr).
Ar ôl cael eu dogfennau adnewyddu, dylai MACs barhau i wirio'r manylion, gan gynnwys bod pob eglwys a neuadd eglwys yn y MAC wedi'u cynnwys. Gall papurau adnewyddu gynnwys ceisiadau am wybodaeth gan yr yswirwyr a dylai MACs ddarparu'r rhain yn y ffordd arferol.
Dylai MACs sicrhau bod unrhyw ddebydau uniongyrchol i Ecclesiastical ar waith tan ddyddiad adnewyddu eu polisi e.e. 1 Ionawr 2027.
Mae gan ambell bolisi ddyddiad adnewyddu gwahanol i 1 Ionawr, a bydd y rhain yn cael eu nodi wrth eu hadnewyddu.

Pa ofynion gweinyddol fydd ar Gynghorau Ardal Gweinidogaeth/ Cenhadaeth yn sgil y newid hwn?

Yr unig beth fydd yn newid yw na fydd yn rhaid i'r MAC wneud taliad adnewyddu i Ecclesiastical na threfnu i ailgodi costau i eglwysi cyfansoddol. Dylai MACs weinyddu'r polisi yswiriant fel y gwnaethant erioed, heblaw am dalu'r premiwm adnewyddu.
Bydd Ecclesiastical yn parhau i anfon pecyn adnewyddu atoch yn y ffordd arferol. Bydd y pecyn hwn yn arddangos y premiwm ac yn gofyn am daliad, ond ni fydd angen i'r MAC dalu'r premiwm.
Mae'n hanfodol bod y MAC/Cabidwl yn parhau i fonitro ei bolisi, yn deall y telerau ac yn cydymffurfio yn unol â hynny. Dylid darparu unrhyw newidiadau ac unrhyw wybodaeth y mae'r yswiriwr yn gofyn amdani yn brydlon.
Y MAC/Cabidwl yw'r parti yswiriedig o hyd, felly rhaid iddo gydymffurfio â gofynion yswiriant yn unol â hynny.

Ai dim ond agwedd adeiladau y polisi yswiriant y mae taliad premiwm Corff y Cynrychiolwyr yn ei hyswirio

Nage. Gall polisïau gynnwys amrywiaeth eang o yswiriant fel difrod i eiddo, yswiriant cyflogwyr ac atebolrwydd cyhoeddus a buddion eraill. Bydd y premiwm polisi yn adlewyrchu'r holl sicrwydd yswiriant a bydd cyfanswm y premiwm hwnnw nawr yn cael ei dalu gan Gorff y Cynrychiolwyr.

A yw adeiladau eraill y MAC/Cabidwl wedi'u cynnwys yn y cynllun talu?

Nac ydyn. Bydd Corff y Cynrychiolwyr yn talu'r premiwm am brif bolisïau eglwysi, eglwysi cadeiriol a neuaddau eglwys. Os yw'r MAC yn rheoli ac yn yswirio adeiladau eraill fel tŷ'r plwyf, yna dylai'r MAC barhau i drefnu'r yswiriant a thalu'r premiwm yn uniongyrchol i Ecclesiastical.
Mae Corff y Cynrychiolwyr wedi ymrwymo i dalu'r premiwm ar gyfer eglwysi, neuaddau eglwys ac eglwysi cadeiriol. Mae'r teitl i Neuaddau Eglwys yn cael ei ddal gan Gorff y Cynrychiolwyr, Bwrdd Cyllid yr Esgobaeth, Ymddiriedolaeth yr Esgobaeth neu'r Ardal Gweinidogaeth (os yw'n CIO).
Os nad yw Neuadd yr Eglwys wedi'i hyswirio gydag yswiriwr enwebedig Corff y Cynrychiolwyr, ni fydd Corff y Cynrychiolwyr yn ad-dalu unrhyw bremiwm.

Sut fydd hawliadau'n cael eu trin?

Nid oes unrhyw newid i'r trefniadau presennol. Dylai MACs wneud hawliadau yn uniongyrchol i Ecclesiastical yn y ffordd arferol.

I bwy ddylai Cyngor Ardal Gweinidogaeth/Cenhadaeth roi gwybod am unrhyw ddiweddariadau neu newidiadau?

Os oes angen i'r MAC drefnu yswiriant ychwanegol, er enghraifft, ar gyfer digwyddiad arbennig neu i dalu am waith adeiladu, dylai gysylltu ag Ecclesiastical a fydd yn paratoi anfoneb ar wahân am unrhyw bremiwm ychwanegol. Y MAC/Cabidwl ddylai dalu'r costau hyn ac ni fyddant yn cael eu had-dalu gan Gorff y Cynrychiolwyr.
Bydd angen i'r MAC dalu'r costau hyn yn llawn adeg y newid ac ni fydd unrhyw drefniant debyd uniongyrchol ar gael.
Os yw MAC yn dymuno ymestyn sicrwydd yswiriant y tu hwnt i'r yswiriant safonol y cytunwyd arno'n genedlaethol, y MAC fyddai’n talu'r costau ychwanegol.

Sut fydd polisïau yswiriant yn cael eu trefnu yn y dyfodol?

Fel nawr, bydd Corff y Cynrychiolwyr yn trefnu telerau cyffredinol yr yswiriant ac yn penderfynu pa yswiriwr ddylai ddarparu yswiriant.
Ar hyn o bryd, mae eglwysi yn destun ymrwymiad hirdymor sy'n golygu y bydd yr adolygiad mawr nesaf o delerau'r polisi a'r darparwr yswiriant ar 1 Ionawr 2029
Lle nad yw Neuaddau Eglwys yn eiddo i Gorff y Cynrychiolwyr, cytunir ar bolisïau yn y dyfodol gyda'r perchnogion priodol.

Sut mae hyn yn cael ei ariannu gan Gorff y Cynrychiolwyr ac a yw'n gynaliadwy?

Mae’r cymorth hwn yn costio dros £2.9m y flwyddyn i Gorff y Cynrychiolwyr
Mae Corff y Cynrychiolwyr yn talu'r gost hon o'i asedau buddsoddi ac mae’n credu y bydd y cymorth yn gynaliadwy yn y dyfodol rhagweladwy. Mae Corff y Cynrychiolwyr yn adolygu ei drefniadau cyllido o bryd i'w gilydd.