Mae digwyddiad eglwysig yn annog teuluoedd i arafu a mwynhau natur

Mae teuluoedd yng Ngwynedd yn cael eu gwahodd i droi cefn ar sgriniau a throi at natur, teithiau cerdded coetir a dipio pyllau, fel rhan o ddigwyddiad eglwysig awyr agored fydd yn cael ei gynnal mewn gwarchodfa natur leol ger Penrhyndeudraeth yr haf hwn.

Bydd “Messy Church Goes Wild”, sy’n cael ei drefnu gan Ardal Weinidogaeth Bro Moelwyn yn Esgobaeth Bangor, yn cael ei gynnal ddydd Sadwrn 13 Mehefin. Nod y digwyddiad yw dod â phobl at ei gilydd yn yr awyr agored i archwilio natur, dysgu am fywyd gwyllt a threulio amser gyda’i gilydd mewn awyrgylch hamddenol.

Bydd y diwrnod yn dechrau gyda sesiynau dipio pyllau lle gall plant ac oedolion ddarganfod y creaduriaid sy’n byw yn y dŵr, cyn mynd am dro drwy’r coed at gyfres o stondinau crefft a gweithgareddau yn y goedwig.

Dywed y trefnwyr fod y digwyddiad wedi’i gynllunio i fod yn agored i bawb, gan gynnwys pobl na fyddent fel arfer yn mynd i’r eglwys.

Nid yw llawer o’r teuluoedd sy’n mynychu digwyddiadau Messy Church yn eglwyswyr rheolaidd, ond maent yn dod am gyfeillgarwch, creadigrwydd a man diogel lle gall plant archwilio a chael hwyl gyda’i gilydd.

Bydd y digwyddiad yn gorffen gyda chyfnod byr o fyfyrio a diolch am y byd naturiol, cyn rhannu pryd o fwyd.

Ar draws Esgobaeth Bangor, mae eglwysi wedi defnyddio digwyddiadau awyr agored a gweithgareddau sy’n canolbwyntio ar natur yn gynyddol i ymgysylltu â chymunedau lleol, yn enwedig teuluoedd a phobl ifanc na fyddent fel arall yn dod i gysylltiad â bywyd yr eglwys.

Ar adeg pan mae llawer o deuluoedd yn chwilio am gyfleoedd i arafu a threulio mwy o amser yn yr awyr agored, mae’r trefnwyr yn gobeithio y bydd y digwyddiad yn helpu pobl i werthfawrogi bywyd gwyllt lleol ac yn annog sgyrsiau am ofalu am y byd o’n cwmpas.

Dywedodd y trefnydd, Yvonne Furber: “Rydyn ni eisiau i bawb werthfawrogi, meithrin a gofalu am y pethau rhyfeddol mae Duw yn eu rhoi inni. Mae’n ymwneud â helpu pobl i ddarganfod y byd o’u cwmpas a deall pam mae hynny’n bwysig.”

Bydd “Messy Church Goes Wild” yn cael ei gynnal rhwng 11yb ac 1yp ddydd Sadwrn 13 Mehefin. Rhoddir union leoliad y digwyddiad wrth archebu. Mae croeso i bawb.

Menter wyddoniaeth dinasyddion yw Eglwysi’n Cyfrif ar Natur sy’n rhedeg ym mis Mehefin bob blwyddyn, gyda’r nod o fynd allan i’r byd naturiol a chyfrif gwahanol rywogaethau er mwyn casglu data y gellir ei ddefnyddio yn y dyfodol ar gyfer cadwraeth a diogelu’r amgylchedd. Eleni, mae’n rhedeg o 6-14 Mehefin.