Hafan Newyddion Degfed Sul Adferiad Cymru

Degfed Sul Adferiad Cymru

Blog Wedi postio: 22 Hydref 2021

Bydd dydd Sul 31ain o Hydref yn garreg filltir arall yn hanes y frwydr yn erbyn dibyniaeth ar alcohol, cyffuriau ac ymddygiadau niweidiol eraill yng Nghymru, meddai Wynford Ellis Owen, Ymgynghoryd.d Cwnsela Arbenigol CYNNAL – y gwasanaeth cwnsela i glerigion, gweinidogion yr efengyl, gweithwyr Cristnogol, a’u teuluoedd.

Unwaith eto eleni, nodwyd Sul fel Sul Adferiad i annog eglwysi nid yn unig i ystyried sefyllfa’r rhai sy’n dioddef o ddibyniaeth o ryw fath, i ddysgu mwy am eu sefyllfa, eu hangen a’r help sydd ar gael trwy ymdrechion mudiadau megis Adferiad, y Stafell Fyw, Inroads a chyflenwyr eraill. Mae hefyd yn gyfle i weithredu yn ymarferol i estyn cymorth. Gall y cymorth olygu cyfraniad ariannol tuag at y gwaith i rai, tra y bydd eraill yn cymryd sylw newydd o’r anogaeth sydd yn Hebreaid 13, 3 “Daliwch ati i gofio’r rheiny sy’n y carchar, gan feddwl sut brofiad fyddai hi i fod yn y carchar eich hunain!” Efallai mai carchar llythrennol sydd dan sylw awdur y llythyr at yr Hebreaid, ond ar Sul Adferiad cofiwn fod caethiwed dibyniaeth ar alcohol, cyffuriau, bwyd, rhyw, gamblo a mwy, yn garchar i gymaint o bobl heddiw

Mae’r gwasanaeth yn seiliedig ar ddameg y Mab Afradlon - dameg sy’n ein hatgoffa o dri cham sydd, o’u cymryd, yn ein rhyddhau i dderbyn cyfle newydd, a thrwy hynny fywyd newydd: Cydnabod, Codi, a Chyfrannu.

"Pa beth bynnag a ddug ein hunanbarch, ein bywyd oddi arnom, beth bynnag yw mwgwd ein parchusrwydd, neu ein dibyniaeth, pan ddisgyn y rheini a’n bywyd yn noeth a’r diddymdra yn cau amdanom, teimlwn ei Gariad yn ein croesawu, ein cynhesu, a’n hadfer."

“Yn eno’r Tad, roeddwn i’n ficer! Trist dweud, roeddwn i’n ficer oedd wedi treulio 18 mlynedd yn credu

bod Duw am i mi weithio 70 neu 80 awr yr wythnos.

Gam wrth gam, o ddydd i ddydd, fe wnes i ddychwelyd at gragen fy mywyd oedd wedi ei chwalu’n llwyr, ac yna yn araf ei gweld yn cael ei rhoi yn ôl at ei gilydd fel porslen brau.”

Bydd y gwasanaeth yn cael ei ddarlledu ar BBC Radio Cymru ar fore Sul 31ain o Hydref - a bydd croeso i chi ddefnyddio’r gwasanaeth hwn yn eich eglwysi. Bydd ar gael i’w lawr lwytho ar ein gwefan: www.cynnal.wales yn fuan.

Yn ogystal, rydym wedi comisiynu emyn newydd, ‘Gweddi Adferiad’, yn arbennig ar gyfer y gwasanaeth. Mae’r geiriau gan Siôn Aled, a’r dôn gan Sioned Webb, a bydd yn cael ei ganu ar y radio gan Begw Rowlands a chôr bychan o aelodau eglwys Bethlehem, Gwaelod-y-Garth.

Dyma ddegfed Sul Adferiad Cymru. Ar y Sul hwn, gwahoddwn Gristnogion Cymru i uno mewn gweddi dros y rhai sy’n gaeth, yn ddibynnol; gan ofyn i Dduw ein helpu ni i’w helpu nhw.

Diolch rhagblaen am bob cydweithrediad a chefnogaeth.