Eglwys yn Eryri yn fuddugol annisgwyl mewn cystadleuaeth Reddit fyd-eang

Mae eglwys fach yn Eryri wedi denu sylw eang ar-lein ar ôl bod y lleoliad olaf i oroesi mewn cystadleuaeth fis o hyd a oedd yn cynnwys cyfranogiad miloedd o ddefnyddwyr Reddit.

Eglwys y Santes Fair, Beddgelert, oedd y lle olaf ar ôl mewn her a gynhaliwyd gan gymuned Reddit r/terriblemaps, a wahoddodd ddefnyddwyr i bleidleisio dro ar ôl tro i ddileu hanner map nes mai dim ond un lleoliad oedd ar ôl.

Dechreuodd y gystadleuaeth gyda’r byd cyfan wedi’i rannu’n ddau hanner. Pleidleisiodd defnyddwyr dros ba hanner ddylai gael ei ddileu cyn i’r ardal oedd yn weddill gael ei rhannu eto, gyda’r broses yn cael ei hailadrodd. Dros 29 rownd, cafodd cyfandiroedd, gwledydd, rhanbarthau a threfi eu dileu fesul tipyn nes i’r gystadleuaeth gulhau i ardal fach o amgylch Beddgelert.

Yn y rownd derfynol, Eglwys y Santes Fair oedd y lleoliad olaf i oroesi.

Mae’r canlyniad yn adlewyrchu agwedd adnabyddus ar ddiwylliant Reddit, lle mae cymunedau ar-lein yn aml yn cofleidio enillwyr annisgwyl ac yn creu jôcs parhaus o’u cwmpas. Wrth i ranbarthau mwy gael eu dileu ac wrth i’r map gulhau tuag at Feddgelert, dechreuodd defnyddwyr gefnogi Eglwys y Santes Fair fwyfwy. Lledaenodd newyddion am y gystadleuaeth y tu hwnt i Reddit hefyd, gyda thrigolion lleol yn ymuno â’r drafodaeth ar-lein ac yn helpu i feithrin cefnogaeth i’r pentref yn ystod y rowndiau olaf.

Canmolodd defnyddwyr Reddit y pentref a’r eglwys. Disgrifiodd un Beddgelert fel “lle hyfryd”, tra ysgrifennodd un arall: “Eglwys hardd. Dim syndod iddi ennill.” Wrth i’r gystadleuaeth ddod i ben, bu cefnogwyr yn annog pobl i ymweld â’r eglwys.

Dywedodd y ficer lleol, y Parch Kim Williams: “Roeddem wedi’n synnu o glywed bod Eglwys y Santes Fair wedi dod yn ganolbwynt cystadleuaeth ar-lein, ond mae’n braf gweld cymaint o bobl yn siarad mor gadarnhaol am Feddgelert ac Eryri.

“Efallai fy mod yn rhagfarnllyd wrth ddweud hyn, ond roedd hi’n sicr yn haeddu ennill! Mae Eglwys y Santes Fair wedi gwasanaethu’r gymuned leol ers cenedlaethau. Rydym bob amser yn falch o groesawu ymwelwyr sy’n dod i fwynhau’r pentref, y tirwedd a’r eglwys.”

Mae Beddgelert yn lle poblogaidd i dwristiaid sy’n archwilio Eryri, gyda Rheilffordd Eryri, llwybrau cerdded drwy Geunant Aberglaslyn, yn leoliad dechrau Llwybr Watkin i fyny’r Wyddfa, ac mae Mwynglawdd Copr Sygun gerllaw.

Saif Eglwys y Santes Fair yn agos at un o dirnodau enwocaf Beddgelert, Bedd Gelert. Mae’r bedd yn gysylltiedig â chwedl y Tywysog Llywelyn a’i gi ffyddlon, Gelert. Yn ôl y chwedl, dychwelodd Llywelyn o hela i ganfod bod ei fab bach ar goll a bod Gelert wedi’i orchuddio â gwaed. Gan gredu bod y ci wedi lladd y plentyn, lladdodd Gelert, cyn darganfod y baban yn ddianaf wrth ymyl corff blaidd yr oedd Gelert wedi’i ladd. Gall ymwelwyr gyrraedd y bedd ar daith gerdded fer ar hyd glan yr afon o’r eglwys.