Ffilm animeiddiedig arobryn am seintiau Môn i gael ei dangos am y tro cyntaf yn Eisteddfod yr Urdd

Bydd ffilm animeiddiedig ddwyieithog am ddau o seintiau mwyaf adnabyddus Cymru yn cael ei dangos am y tro cyntaf yn Gymraeg yn ystod Oedfa’r Urdd, gwasanaeth Sul Eisteddfod yr Urdd, ar 24 Mai 2026 ar Faes Sioe Môn.

Enillodd Stori Cybi a Seiriol (The Story of Cybi and Seiriol) wobrau am y Ffilm Addysgol Orau a’r Ffilm Animeiddiedig Orau yng Ngŵyl Ffilm Gristnogol 2026 sydd wedi’i lleoli yn Florida.

Mae’r ffilm yn dilyn hanes Seintiau Cybi a Seiriol, dau ffigwr o’r chweched ganrif y bu eu ffydd a’u cyfeillgarwch yn helpu i lunio bywyd Cristnogol yng Nghymru. Mae’n olrhain taith Cybi o Jerwsalem i Ynys Môn a thaith Seiriol drwy Gymru, gyda’r ddau sant yn cyfarfod wrth Ffynnon Clorach yng nghanol Ynys Môn.

Mae’r ffilm yn defnyddio animeiddio ac awyrluniau i ddod â straeon y seintiau yn fyw ar draws ffynhonnau sanctaidd, mynachlogydd a thirweddau arfordirol. Cafodd ei chynhyrchu yn Gymraeg ac yn Saesneg.

Cafodd Stori Cybi a Seiriol ei chynhyrchu a’i chyd-ysgrifennu gan Nia Elain Roberts, Swyddog Addysg Ysgolion Esgobaeth Bangor, a Hywel Griffiths o Griffilms Animation Studio - TheGas.uk, a gyd-ysgrifennodd ac animeiddiodd y cynhyrchiad. Nia sy’n darparu’r naratif, gyda’r Parchedig Ganon Emlyn Williams yn rhoi llais i Gybi.

Bydd y dangosiad yn rhan o Oedfa’r Urdd, sy’n canolbwyntio ar thema pererindod. Bydd Erin Pererin, canllaw pererindod ffuglennol i blant a grëwyd gan Nia ac a chwaraeir gan aelod o gôr Ysgol Sul Môn, yn cyflwyno’r oedfa. Bydd perfformiadau gan Gôr Ieuenctid Môn a chôr Ysgol Sul Môn hefyd yn rhan o’r gwasanaeth.

Y ffilm yw’r adnodd diweddaraf ar PererinYsgolion.cymru, gwefan a ddatblygwyd gan Esgobaeth Bangor sy’n darparu adnoddau addas i oedran ar bererindod Gristnogol, seintiau a mannau sanctaidd i gefnogi’r cwricwlwm Crefydd, Gwerthoedd a Moeseg (RVE). 

Mae Erin Pererin yn ymddangos ar draws y wefan, gan arwain plant drwy’r adnoddau a’u cyflwyno i’r syniad o bererindod a threftadaeth Gristnogol Cymru. Mae’r prosiect yn rhan o waith ehangach yr Esgobaeth i annog ymgysylltiad â phererindod a mannau sanctaidd, ar adeg pan fo diddordeb mewn pererindod wedi cynyddu yn dilyn cyfres Pilgrimage y BBC.

Dywedodd Nia ei bod eisiau i blant ddeall yr hanes y tu ôl i’r eglwysi yn eu cymunedau eu hunain, “Mae eglwysi yn ganolfannau pwysig i’r ffydd Gristnogol, ond maen nhw hefyd yn ein dysgu am ein treftadaeth. Roedd seintiau Cymreig fel Cybi a Seiriol yn gweld mai adeiladu cymunedau, cryfhau ffydd, a helpu eraill oedd y ffordd ymlaen.”

Wrth sôn yn benodol am hanes Cybi, dywedodd, “Ar ôl marwolaeth ei dad, gwrthododd Cybi y cyfle i ddod yn frenin Cernyw a dewis yn hytrach ddilyn bywyd o ffydd. Mae ei hanes yn dangos bod ei gred yn Nuw yn bwysicach iddo na grym, ac mae hynny’n parhau’n neges ysbrydoledig heddiw.”

Yr haf hwn bydd Llwybr Cybi a Seiriol yn cael ei lansio, sef llwybr pererindod newydd ar Ynys Môn sy’n dilyn ôl traed y ddau sant drwy eglwysi, ffynhonnau sanctaidd a thirweddau arfordirol yr ynys.

Gall ysgolion ymweld â PererinYsgolion.cymru i gael adnoddau sy’n cefnogi’r cwricwlwm CGaM.

Mae Oedfa’r Urdd yn cael ei chynnal yn y Pafiliwn Gwyrdd o 0915 ymlaen.