Disgybl o Wrecsam yn ennill Cystadleuaeth Cerdyn Nadolig yr Esgob

Mae disgybl yn Ysgol Eglwysig Wrecsam wedi ennill y wobr gyntaf yng Nghystadleuaeth Cerdyn Nadolig Esgob Llanelwy.

Dewiswyd dyluniad Matilda Jones, 11 oed, o Ysgol Uwchradd Gatholig ac Anglicanaidd Sant Joseff yn Wrecsam, ar gyfer cerdyn Nadolig yr Esgob a anfonir at gydweithwyr, ffrindiau a theulu ledled y byd.

Roedd gwaith celf Matilda yn cynnwys angylion yn cyhoeddi genedigaeth Iesu mewn stabl, gyda Mair a Joseff yn edrych drosodd. Tarodd ei dyluniad y briff a roddwyd i bob un o 49 Ysgol yr Eglwys yng Nghymru yn Esgobaeth Llanelwy: Cân yr Angylion: Gloria in Excelsis Deo gyda ffocws ar gerddoriaeth, llawenydd, a gobaith. Mae'n seiliedig ar hanes ymddangosiad yr angylion i'r bugeiliaid a adroddir yn ôl Efengyl Sant Luc.

Cyflwynwyd gwobr i’r enillydd mewn gwasanaeth blwyddyn 7 arbennig y mynychwyd gan Esgob Llanelwy, ei wraig, Clare Cameron, Pennaeth Addysg, Gwaith Plant a Ieuenctid Esgobaeth Llanelwy, Louise Williams, Ysgrifennydd yr Esgobaeth, Olwen Lintern-Smyth a chlerigwyr o bob rhan o Wrecsam y bore yma (10 Rhagfyr).

Dywedodd y Gwir Barchedig Gregory Cameron: “Mae'r beirniaid bob amser yn cael eu taro gan greadigrwydd a thalent y disgyblion yn ein hysgolion eglwysig a’r ffordd y maent yn dehongli'r thema. Mae ein hysgolion eglwysig yn gwneud gwaith mor dda ac mae cydweithio â nhw ar gyfer y gystadleuaeth hon yn wir lawenydd. Diolch i'r staff a roddodd amser o'r neilltu i gefnogi'r plant i ddeall y thema ac i ddylunio eu ceisiadau. Llongyfarchiadau i Matilda a diolch i bawb a gymerodd ran yn y gystadleuaeth.”

Derbyniwyd tua dwy fil o geisiadau gan ysgolion ar draws gogledd-ddwyrain a chanolbarth Cymru a barnwyd y dyluniadau gan Louise Williams a Clare Cameron.

Mae’r enillwyr yn derbyn tocyn llyfr a thystysgrif. Yn ogystal, derbyniodd Matilda brint mawr wedi’i fframio o’i dyluniad, ynghyd â deg o’r cardiau Nadolig ar gyfer ei defnydd personol. Rhoddwyd tystysgrifau hefyd i'r plant o'r holl ysgolion yr enillodd eu gwaith statws Canmoliaeth Uchel Iawn neu Ganmoliaeth Uchel.

Mae Esgobaeth Llanelwy yn rhan o’r Eglwys yng Nghymru, Talaith ymreolaethol o fewn Cymun Anglicanaidd Byd-eang yr Eglwysi. Mae'r esgobaeth yn gymuned o 210 o eglwysi a 49 o ysgolion eglwysig, sy'n cwmpasu siroedd Sir Ddinbych, Sir Fflint, Wrecsam a rhannau o Gonwy, Gwynedd a Phowys.

Y rhestr lawn o’r rhai a ddyfarnwyd gwobrau yw:

• Wobr 1af: Matilda Jones (11 oed) o Ysgol Uwchradd Sant Joseff
• Cyd-wobr 2il:
  • Otis Jackson (8 oed) o Ysgol Santes Fair, Rhosllanerchrugog (Ruabon)
  • Alicia Florek (7 oed) o Ysgol Sant Giles, Wrecsam
• Cyd-wobr 3ydd:
  • Emily Kent (blwyddyn 6) o Ysgol Llanbedr
  • Vadim Amtoniv (9 oed) o Ysgol Pentre, Penarlâg (Hawarden)