Prosiect addysg newydd yn dod â seintiau a straeon Bangor i’r ystafelloedd dosbarth

Mae Esgobaeth Bangor wedi ymuno â Phrifysgol Bangor a phartneriaid lleol i lansio prosiect addysg newydd sy’n dod â threftadaeth gyfoethog y ddinas i’r ysgolion.

Mae rhaglen Coleg Treftadaeth Bangor yn cynnwys modiwlau ar fywyd ac etifeddiaeth Sant Deiniol, Eglwys Gadeiriol Bangor, Eglwys Sant Tegai yn ogystal â thirnodau enwog eraill ar draws y ddinas. Drwy wersi rhyngweithiol ac ymweliadau, bydd disgyblion yn archwilio hanes lleol, adeiladau hynod a thraddodiadau pererindod, gan gryfhau eu cysylltiad â hynaf ddinas Cymru. Mae’r prosiect yn cael ei lansio fel rhan o ddathliadau 1500 mlwyddiant Bangor.

Mae adnoddau ar bererindod, ymgysylltiad eglwysig a hanes y seintiau wedi’u creu ar gyfer ysgolion ac eglwysi lleol.

Bydd myfyrwyr yn gallu ennill credydau drwy gwblhau modiwlau ymchwil ar dreftadaeth Bangor, gan weithio tuag at dystysgrifau efydd, arian ac aur. Bydd y rhaglen yn dod i ben gyda seremoni raddio i’r rhai sy’n cwblhau’r credydau.

Mynychodd dros 30 o ddisgyblion o saith ysgol lansiad y prosiect yng Nghanolfan Hanesyddol Neuadd Powis ym Mhrifysgol Bangor. Croesawyd hwy gan Dr Martin Hanks, Cyfarwyddwr y Ddinas, a’r Cynghorydd Medwyn Hughes, Maer Bangor, gan ddilyn gyda arweinwyr y prosiect, sef Nia Young, Darlithydd Uwch mewn Addysg a Chynghori, a Mervyn Jones, yn cyflwyno’r rhaglen.

Fel rhan o waith addysg Esgobaeth Bangor, mae adnoddau ar bererindod, ymgysylltiad eglwysig a hanes y seintiau wedi’u creu ar gyfer ysgolion ac eglwysi lleol. Bu Nia Elain Roberts, Swyddog Ymgysylltu Pererindod Ysgolion yr Esgobaeth, yn cydweithio â Mervyn Jones i greu unedau ar Eglwys Gadeiriol Bangor a Sant Deiniol.

Dywed Nia: “Mae’r Coleg Treftadaeth yn adnodd rhagorol i athrawon sy’n cwrdd â gofynion y Cwricwlwm newydd o ran dealltwriaeth dysgwyr o’u hamgylchedd lleol. Mae’n cynnig cyfle i danio chwilfrydedd, annog plant, eu teuluoedd a’r ysgolion i ymweld â’r Gadeirlan ac sefydliadau eraill o gwmpas y ddinas.”

“Drwy dasgau ymchwil annibynnol, bydd dysgwyr yn ehangu eu gwybodaeth, yn dysgu parchu eu hardal leol, ac yn cael y cyfle i deimlo balchder yn yr hyn sydd o’u cwmpas.”

Dywed Dr Nia Young: “Mae Coleg Treftadaeth Bangor yn gyfle arbennig i bobl ifanc ddysgu mwy am hanes cyfoethog ardal Bangor. Mae’n ffordd i fyfyrwyr ymgysylltu â’u cymuned leol ac i ni gryfhau’r cysylltiad rhwng y Brifysgol, y ddinas a’r genhedlaeth iau.”

Bydd tîm y Coleg Treftadaeth yn ymweld ag ysgolion yn y Flwyddyn Newydd i gynorthwyo disgyblion wrth iddynt ddechrau gweithio drwy’r modiwlau.

“Rydyn ni’n hynod gyffrous i weithio gydag ysgolion ym Mangor i gefnogi plant wrth iddynt archwilio eu treftadaeth leol dros y misoedd nesaf. Diolch arbennig i Mervyn Jones am baratoi’r modiwlau dysgu, sy’n amhrisiadwy wrth gysylltu disgyblion ysgolion lleol â hanes a threftadaeth gyfoethog Bangor.”

I gael gwybod mwy ac i gael mynediad at y cwrs, ewch i: 
https://www.bangor.ac.uk/cy/cymuned/coleg-treftadaeth-bangor