Digwyddiad yng Nghadeirlan Bangor i helpu pobl wynebu heriau bywyd

Bydd bore tawel yng Ngadeirlan Bangor yn gwahodd pobl i oedi a myfyrio ar yr heriau, y siomedigaethau a’r trobwyntiau sy’n siapio ein bywydau i gyd.

Cynhelir y bore tawel ar ddydd Sadwrn 21 Chwefror am 10.00 ac mae’n nodi dechrau’r Grawys. Fe’i harweinir gan y Parchedig Ganon Dr Trystan Owain Hughes, ac mae’r bore wedi’i ysbrydoli gan ei lyfr diweddaraf, To Hell’s Mouth and Back, sy’n archwilio sut y gall gobaith fodoli hyd yn oed mewn cyfnodau o boen, ansicrwydd ac bregruswydd.

Mae’r digwyddiad yn agored i bawb, o unrhyw ffydd neu ddim o gwbl, sy’n chwilio am amser i fyfyrio.

Mae To Hell’s Mouth and Back wedi’i ddewis gan Archesgob Cymru, Cherry Vann, fel ei Llyfr Grawys swyddogol ar gyfer 2026. Yn y llyfr, mae Trystan Hughes, sy’n wreiddiol o Benmaenmawr, yn myfyrio ar ddwy daith bersonol heriol: taith gerdded hir a blinderus 140 milltir ar draws Gogledd Cymru, ac ail daith annisgwyl drwy wella ar ôl anaf difrifol i’r cefn. Trwy’r profiadau hyn, mae’n ymchwilio i sut y gall adegau anoddaf bywyd hefyd ddod yn lefydd o dwf, ystyr a gobaith.

I Trystan, nid mater o gerdded yn gorfforol yn unig yw pererindod, ond cydnabod y patrymau cyffredin yn ein bywydau — boed hynny drwy alar, salwch, gwaith, ffydd neu newidiadau mawr mewn bywyd — a darganfod dealltwriaeth ddyfnach a phwrpas ar hyd y daith.

“Yn To Hell’s Mouth and Back rwyf am ysbrydoli darllenwyr i ddod o hyd i obaith a llawenydd ym mhob rhan o’u bywydau – mewn eiliadau o dawelwch, mewn teithiau cerdded yng nghefn gwlad neu mewn parc lleol, mewn amser gyda theulu neu ffrindiau, neu yn y gwaith neu mewn hobïau,” meddai Trystan.

“Yn y llyfr, rwy’n archwilio’r ddioddefaint a’r llawenydd annisgwyl a ddaeth yn sgil fy nheithiau trawsnewidiol fy hun. Drwy hyn, fy ngobaith yw y bydd rhywbeth o’m stori yn taro tant gyda phrofiadau pobl eraill ac yn eu hannog i gerdded eu taith gyda ffydd, dewrder ac, yn anad dim, gobaith.”

“Yn ystod y diwrnod tawel byddwn yn symud y Grawys o fod yn amser i ‘roi’r gorau’ i bethau i fod yn amser i ‘agor’ teithiau ein bywydau i heddwch, gobaith, llawenydd a thosturi Duw.”

Mae’r llyfr, sydd ar gael yn Gymraeg ac yn Saesneg, yn cynnwys canllaw astudio cryno wedi’i gynllunio i gefnogi myfyrdod unigol neu drafodaeth grŵp drwy’r cyfnod o’r Grawys, y chwe wythnos sy’n arwain at y Pasg.