Penodi Prif Swyddog Gweithredol newydd ar gyfer Esgobaeth Tyddewi

Mae Bwrdd Cyllid Esgobaeth Tyddewi wedi cyhoeddi penodiad Mr Iwan Thomas fel Ysgrifennydd a Phrif Swyddog Gweithredol newydd yr Esgobaeth.

Mae Mr Thomas yn ymuno â'r esgobaeth o'i rôl bresennol fel Prif Weithredwr Planed, partneriaeth a arweinir gan y gymuned sy'n gweithredu fel menter gymdeithasol, Ymddiriedolaeth Datblygu, ac elusen.

Dywedodd Cadeirydd y Bwrdd Cyllid, Tim Llewelyn: "Mae ehangder ei brofiad, ei ymrwymiad i'r gymuned, a'i enw da ym maes arweinyddiaeth sefydliadol yn ei roi mewn sefyllfa eithriadol o dda i wasanaethu'r Esgobaeth ar yr adeg bwysig hon.”

Wedi'i eni a'i fagu yng Nghaerfyrddin, mae Iwan yn addolwr rheolaidd yn Eglwys y Santes Fair, Llan-llwch, lle mae'n chwarae rhan weithredol yn ei chenhadaeth a'i thystiolaeth. “Bydd ei wreiddiau dwfn yn y rhanbarth a'i ymrwymiad i fywyd yr Eglwys yn gaffaeliad mawr i'r esgobaeth," meddai Mr Llewelyn.

“Gyda 25 mlynedd a mwy o brofiad fel arweinydd ar draws y sector cyhoeddus, y sector addysg a'r trydydd sector yng Nghymru, daw â ffocws cryf ar wasanaeth, ar y gymuned ac ar effaith gymdeithasol gynaliadwy. Mae wedi arwain sefydliadau yn llwyddiannus trwy gyfnodau o drawsnewid, ailstrwythuro ac ehangu sylweddol, gan sicrhau sefydlogrwydd ariannol a meithrin arloesedd.”

Ymunodd Iwan â Planed yn 2018, gan gymryd yr awenau ar adeg o her sylweddol. Gan gadw personél allweddol a recriwtio staff profiadol newydd, mae Iwan wedi trawsnewid a thyfu PLANED, o elusen a arferai ganolbwyntio ar Sir Benfro yn unig, i fod yn sefydliad cyflenwi rhanbarthol cynaliadwy, gyda phroffil amlycach a dylanwad cenedlaethol.

Bydd yn dechrau ar ei swydd ar 5 Mai, gan olynu Howard Llewellyn, sydd wedi dal y swydd ers 2018.

“Rydw i am ddiolch o waelod calon am gyfraniad helaeth Howard dros y blynyddoedd,” meddai Tim Llewelyn. “Mae ei ffordd dawel a digynnwrf, ynghyd â'i ddoethineb a'i arweiniad cyson, wedi bod yn amhrisiadwy.”