Galwad i weddi a thystiolaeth gyhoeddus dros heddwch yn y Wlad Sanctaidd
Y mae’r datganiad canlynol wedi ei gyhoeddi gan Fainc Esgobion yr Eglwys yng Nghymru:
Mae asiantaethau Cristnogol o bob cwr o'r DU a thu hwnt yn galw ar eglwysi ledled Prydain i weddïo dros heddwch ddydd Sul Medi 21ain, sy'n cyd-fynd â Diwrnod Heddwch y Byd y Cenhedloedd Unedig a'r alwad fyd-eang i weddi o bob rhan o Gyngor Eglwysi'r Byd.
Gan ddwyn mewn cof yr erchyllterau cynyddol yr ydym yn eu gweld yn Gaza a thu hwnt, rydym yn ysgrifennu i annog holl aelodau'r Eglwys yng Nghymru i dderbyn yr alwad hon a gweddïo am heddwch, fel cymuned yn ystod gweithredoedd addoli cyhoeddus ac yn bersonol yn ystod eich amseroedd gweddi preifat eich hun.
Gellir dod o hyd i ragor o wybodaeth a rhai adnoddau yma: https://docs.google.com/document/d/1X3wnrvF00x5F8c0VlxGygCrn6ajKiv2QZ_n3saPpHgw/edit?usp=sharing
Mae 'Llinell Goch' hefyd wedi'i gynllunio ar gyfer y tu allan i'r Senedd ym Mae Caerdydd am 12.30pm ddydd Mercher Medi 24ain. Bydd hyn ar ffurf Tystiolaeth Weladwy a Gweddïau Cyhoeddus dros Heddwch. Mae'r Archesgob Cherry yn bwriadu bod yn bresennol. Os ydych chi'n gallu ymuno â hyn, gwnewch os gwelwch yn dda. Bydd mwy o wybodaeth yn dod allan yn yr wythnos nesaf.
+Cherry Cambrensis (Archesgob Cymru ac Esgob Mynwy, Cherry Vann)
+Gregory Llanelwy (Esgob Llanelwy, Gregory Cameron)
+John Abertawe ac Aberhonddu (Esgob Abertawe ac Aberhonddu, John Lomas)
+Mary Llandaf (Esgob Llandaf, Mary Stallard)
+Dorrien Tyddewi (Esgob Tyddewi, Dorrien Davies)
Gweddi dros y Tir Sanctaidd ar gyfer Medi 21
Dad Grasol, daeth dy Fab bendigedig, Iesu Grist o’r nefoedd i fod yn fara’r gwirionedd sy’n rhoi bywyd i’r byd:
Yn dy drugaredd, dyro fwyd i bawb yn Gaza a thu hwnt sy’n dioddef o newyn er mwyn iddynt dderbyn bara materol i fwydo eu cyrff a bara nefol i gynnal eu heneidiau.
Trwy rym dy Ysbryd, tyrd â’r rhyfel creulon hwn i ben ar frys gyda rhyddhad i’r holl garcharorion, gofal meddygol i’r clwyfedig, cysur i’r rhai sydd wedi colli anwyliaid ac agor lwybr i greu heddwch cyfiawn a pharhaol yma yn y wlad lle bu dy Fab, ein Harglwydd Iesu Grist ei hun yn gweini yn ystod ei fywyd daearol.
Yr hwn sy’n byw ac yn teyrnasu gyda thi a’r Ysbryd Sanctaidd, un Duw, yn awr a hyd byth.
Amen
Y Parchedicaf Ddr. Hosam E. Naoum, Archesgob Anglicanaidd yn Jerwsalem, Awst 2025