Dogfennau Diogelu
Mae Efengyl Iesu’n syml a chymhleth ar yr un pryd. Mae’n datgan bod Duw yn ein caru yn ddiderfyn a diamod, pwy bynnag ydym ni, am mai Ef yw ein creawdwr. Mae cariad Duw tuag atom, a ymgorfforwyd yn Iesu trwy Ei eiriau, Ei wyrthiau a’i weithredoedd o drugaredd, yn adlewyrchu Ei ymroddiad llwyr i’w fyd Ef.
Yn ddisgyblion i Iesu, gelwir arnom i’w efelychu mewn bywyd o wasanaeth cariadus, sydd wedi’i wreiddio yn ein hargyhoeddiad y gelwir arnom, gan inni gael ein creu ar ddelw Duw, i gydnabod y ddelw honno yn ein holl frodyr a’n chwiorydd a’u gwasanaethu hwy fel y bu i Dduw yng Nghrist ein gwasanaethu ninnau. Mae’r gwerth unigryw sydd gan bob un ohonom fel plentyn i Dduw yn ennyn ynom gariad a pharch at ein gilydd.
Soniai Iesu yn aml am yr angen i drysori plant a byddai’n gwasanaethu oedolion a oedd yn agored i niwed am wahanol resymau. Rhaid i’r Eglwys, wrth weinidogaethu i blant ac oedolion sydd mewn perygl, gyfleu’r gofal a’r trugaredd hwnnw a gafwyd yn yr Iesu.
Ar sail y gwerthoedd a’r egwyddorion hyn, mae’r Eglwys yng Nghymru wedi ymrwymo i sicrhau’r safonau ymddygiad a gofal uchaf wrth weithio gyda phlant a phobl ifanc mewn perygl. Mae gennym gyfrifoldeb tuag at aelodau’r Eglwys, ac at bawb sy’n dod atom am ba reswm bynnag, i’w croesawu mewn ffordd sy’n adlewyrchu’r croeso a gawn ni gan Dduw. Mae’n rhaid i ni sicrhau bod ein heglwysi yn fannau diogel lle mae pobl yn teimlo bod eu llais yn cael ei glywed a’u bod yn cael eu gwerthfawrogi. Mae’n rhaid i ni sicrhau bod ein gwaith gyda phlant ac oedolion, yn enwedig y rhai sy’n agored i niwed, yn darparu gofal a chymorth priodol i’r rhai mewn angen, gan osod fframwaith a chanllawiau i’r rhai sy’n arfer eu gweinidogaeth, boed yn ordeiniedig neu’n lleyg, yn eu gwaith gyda phobl ifanc a phobl agored i niwed.
Gobeithio y bydd y ddogfen hon, a gwaith pawb sy’n ymwneud â’r maes diogelu yn y dalaith ac yn yr esgobaethau a’r plwyfi, yn gwneud cyfraniad enfawr at hwyluso’r gwaith pwysig hwn.
Y Parchedicaf Ddr Barry Morgan
Trosglwyddo:
- Polisi Diogelu (1949) (PDF)
- Ffurflenni Diogelu (Fersiwn Word o'r ffurflenni yn y Polisi uchod)
cyf: 1949
- Poster Polisi Diogelu (PDF)
cyf: 1993
