Canllawiau ar Coronavirus (Covid-19)

Lawrlwytho:

Lawrlwytho:

Canllawiau Bugeiliol Pellach gan Fainc yr Esgobion

Mewn grym nes y nodir yn wahanol

Canllawiau wedi’u diweddaru

Cyhoeddir y canllawiau diweddaredig hyn yn sgil y newidiadau diweddar i Reoliadau Llywodraeth Cymru ar ailagor mannau addoli ar gyfer gweddi breifat/bersonol.

Adeiladau eglwysig: ailagor ar gyfer gweddi breifat/bersonol

Mae Llywodraeth Cymru wedi cyhoeddi y gellir ailagor mannau addoli i unigolion neu aelwydydd ar gyfer gweddi breifat (bersonol) yn unig o ddydd Llun 22 Mehefin ymlaen.

• Ni all mannau addoli gynnal gweithgareddau fel gwasanaethau a gweddïau a fydd yn annog pobl i ymgynnull
• Ymhellach, ni chaniateir gweithgarwch crefyddol sy’n cynnwys cyswllt corfforol, cyd-adrodd, canu neu lafarganu a gweithgareddau sy’n defnyddio cyfarpar a rennir
• Ni all unigolyn arwain defosiynau, ffurf o wasanaeth neu weddi o unrhyw fath
• Mae’n rhaid i bob man addoli gynnal asesiad risg Covid-19 cyn agor.

Mae’n hanfodol mabwysiadu agwedd ofalus at ailagor, yn gwbl seiliedig ar ganllawiau Llywodraeth Cymru. Yr hyn sydd wedi’i gyhoeddi yw caniatâd. Nid yw Llywodraeth Cymru nac Esgobion yr Eglwys yng Nghymru yn ei gwneud hi’n ofynnol i ailagor ar hyn o bryd. Mae’n rhaid i unrhyw eglwys sy’n ystyried ailagor gynnal asesiad risg manwl i ddechrau. Mae canllawiau ar beth mae hyn yn ei olygu yma. Mae’r rhain yn cynnwys templed o ffurflen asesu risg. Bydd angen ei chyflwyno i’ch Archddiacon (neu unigolyn enwebedig arall) cyn ailagor.

Er ein bod ni gyd yn edrych ymlaen at y dydd pan all ein holl eglwysi agor yn ddiogel rydym yn annog eglwysi lleol i beidio â rhuthro i ailagor. Dim ond os gallwch wneud hynny’n effeithiol ac yn ddiogel o fewn y canllawiau y dylech ystyried ailagor. Gwnewch yn siŵr bod eich trefniadau agor yn cyfateb i’ch capasiti er mwyn gallu cydymffurfio â’r mesurau diogelwch angenrheidiol. Ein prif flaenoriaeth o reidrwydd yw iechyd a lles ein clerigion, staff, gwirfoddolwyr ac ymwelwyr.

Defnydd o adeiladau

Mae Rheoliadau Llywodraeth Cymru’n caniatáu i glerig recordio neu ddarlledu gwasanaeth (heb gynulleidfa) o adeiladau eglwysig. Dylid cynnal unrhyw ddigwyddiadau o’r fath yn unol â chanllawiau’r esgobaeth, neu gyda chaniatâd penodol Esgob yr esgobaeth.

Mae Rheoliadau Llywodraeth Cymru yn caniatáu i glerigion ymweld â’u heglwysi hefyd, ac i swyddogion eglwys eraill a gwirfoddolwyr ymweld ag eglwysi i gyflawni dyletswydd gwirfoddol neu elusennol yn unig, lle nad yw’n ymarferol resymol i gyflawni’r ddyletswydd honno o gartref. Gall clerigion, neu unigolyn arall a enwebir gan y Periglor, Arweinydd Ardal Gweinidogaeth/Cenhadaeth, Deon Ardal neu Archddiacon gynnal archwiliadau safle. Gofynnwn i chi gynnal cyn lleied ohonynt ag sy’n rhesymol.

Bellach hefyd, gall y corff ymddiriedolwyr sy’n gyfrifol am adeilad yr eglwys ystyried caniatáu i gontractwyr a gwirfoddolwyr lleol gynnal gwaith hanfodol ac angenrheidiol i’w heglwys a’u mynwent yn amodol ar drefniadau cadw pellter a hylendid addas.

Mae Rheoliadau Llywodraeth Cymru’n caniatáu defnyddio adeiladau eglwysig ar gyfer gwasanaethau gwirfoddol hanfodol (fel banciau bwyd, ceginau cawl a llochesi digartref sydd eisoes ar waith). Gellir defnyddio adeiladau eglwysig i ddarparu gwasanaethau brys i’r cyhoedd hefyd ar gais Gweinidogion Cymru neu awdurdod lleol. Dylid cymryd pob mesur rhesymol i sicrhau bod arferion cadw pellter cymdeithasol a rhagofalon hylendid eraill yn cael eu dilyn wrth ddarparu’r gwasanaethau hynny. Dylai unrhyw ddefnydd newydd o adeilad eglwys ar gyfer gwasanaethau gwirfoddol / cyhoeddus hanfodol gael ei gefnogi’n benodol gan y periglor neu Ddeon Ardal ac esgob yr esgobaeth.

Mae’n rhaid cadw neuaddau eglwys ar gau o hyd er mae Llywodraeth Cymru’n ystyried a ellir llacio rhywfaint yn enwedig mewn perthynas â darpariaeth ysgolion meithrin. Byddwn yn diweddaru’r canllawiau hyn cyn gynted ag y bydd y sefyllfa’n glir.

Mae canllawiau pellach ar ddefnyddio a gofalu am adeiladau eglwysig yn cael eu cyhoeddi gan swyddogion Corff y Cynrychiolwyr: Covid 19 - Canllawiau adeiladau eglwysig

Ymweld bugeiliol

Dylai clerigion ac eraill sydd wedi’u trwyddedu neu eu comisiynu’n briodol gyflawni eu gweinidogaeth fugeiliol gyffredin o bellter, dros y ffôn ac ar-lein. Dim ond pan fyddant yn hanfodol y dylid gwneud ymweliadau bugeiliol; yn gyffredinol, dylai ymweliadau o’r fath fod i stepen drws ac mae’n rhaid cadw at fesurau cadw pellter yn fanwl gywir. Gall Esgobion unigol roi cyngor manylach i’w clerigion ar ymweliadau a ystyrir yn ‘hanfodol’ ganddynt a gall clerigion ymgynghori â nhw mewn unrhyw achos lle mae amheuaeth.

Bedydd

Ni ellir cynnal bedydd mewn eglwys ar hyn o bryd. Dim ond yn y cartref, mewn ysbyty, hosbis neu leoliad arall os oes argyfwng bugeiliol eithafol y gellir eu cynnal, lle gall bedydd gael ei gynnal gan unigolyn lleyg. Mae’r drefn ar gyfer bedydd brys wedi’i hatodi isod.

Gweddi a thystio

Nid yw dyletswydd pobl Dduw i dystio i Grist wedi’i lleihau yn y cyfnod hwn; na’n rhwymedigaeth i weddïo’n ddi-baid dros ein cymunedau a phawb mewn angen. Rydym yn cymeradwyo popeth sy’n cael ei wneud er gwasanaeth i Dduw i ofalu’n fugeiliol am ein cymunedau, ac i alluogi addoli, gweddi a defosiwn i barhau yn y cartref.

Rydym yn parhau i gadw pawb sy’n orbryderus, pawb sy’n sâl, a phawb sy’n galaru yn ein gweddïau, gan ofyn i bresenoldeb y Crist atgyfodedig fod yn agos atom i gyd a rhoi i ni sicrwydd, tangnefedd a chryfder yn y cyfnod poenus a phryderus hwn.

Trefn ar gyfer Bedydd Brys

Mewn argyfwng, os nad oes gweinidog ordeiniedig ar gael, gall unigolyn lleyg fod yn weinidog bedydd. Cyn bedyddio, dylai’r gweinidog ofyn am enw’r baban / unigolyn i’w fedyddio. Os, am unrhyw reswm, bod yna ansicrwydd ynghylch enw’r baban / unigolyn, gellir gweinyddu’r bedydd yn briodol heb enw (cyn belled â’i bod hi’n bosibl cofnodi hunaniaeth yr unigolyn sy’n cael ei fedyddio’n briodol).

Mae’r ffurf ganlynol yn ddigonol:

Mae’r gweinidog yn tywallt dŵr ar y unigolyn sydd i’w fedyddio, gan ddweud

Rwy’n dy fedyddio di yn Enw’r Tad, a’r Mab, a’r Ysbryd Glân.
Amen.

Yna gall pawb adrodd Gweddi’r Arglwydd a’r Fendith.

Dylai unrhyw unigolyn sydd wedi gweinyddu bedydd yn breifat mewn argyfwng wneud cofnod gofalus o ddyddiad a lleoliad y bedydd a’r unigolyn a gafodd ei fedyddio. Dylai anfon manylion i offeiriad y plwyf cyn gynted ag sy’n bosibl ac yn ddi-oed.

Dylai offeiriad y plwyf sicrhau bod y cofnod arferol yn cael ei gofnodi yn y gofrestr bedyddiadau.

Mainc yr Esgobion Dydd Gwener 19 Mehefin 2020