Bydd Archesgob Cymru yn dweud heddiw bod pwysigrwydd cynyddol Caerdydd fel dinas ryngwladol yn dangos hyder newydd yng Nghymru fel cenedl.

Yn ei anerchiad Gŵyl Ddewi dywed y Dr Barry Morgan fod Caerdydd yn ganolbwynt i’n bywyd cenedlaethol yn yr un modd ag y mae Dewi Sant yn symbolaidd bwysig i Gymru gyfan. Ond er y dylem ddathlu llwyddiant y brifddinas, rhybuddiodd na ddylem golli diddordeb yng ngweddill y wlad.

Mewn pregeth yn Eglwys Sant Ioan yng nghanol Caerdydd, dywedodd y Dr Morgan,  “Ar yr ŵyl genedlaethol hon, fel y mae’n bosibl bod yn Gymry balch a sylweddoli ein bod ar yr un pryd yn perthyn i’r ddynolryw gyffredin ac nad anghydnaws mo’r ddeubeth, y mae’n bosibl hefyd llawenhau yn y ddinas hon heb anghofio pwysigrwydd gweddill Cymru”.

Dywedodd mai’r weledigaeth y tu ôl i gynlluniau adfywio Caerdydd, gyda’i hadeiladau eiconig – y Senedd, Canolfan y Mileniwm, y Ganolfan Griced Ryngwladol ac, yn ddiweddar, ganolfan siopa Dewi Sant – oedd gwneud Caerdydd yn ddinas ag iddi arbenigrwydd rhyngwladol a hyrwyddo economi’r ddinas a’r ardal ac, yn wir, economi Cymru gyfan.
 
“Fe all,” meddai, “y bydd rhai ohonoch sydd yma heddiw o ogledd neu orllewin Cymru yn dweud: ‘Fel yna y mae hi: y de yn rheoli fel erioed’. Yn union fel mai sant o’r de yw ein nawddsant, fe ganolir popeth bellach yn y de, yng Nghaerdydd ... A dyna lle y mae gan arwyddocâd symbolaidd le i’w chwarae. Yn union fel y mae i Ddewi Sant arwyddocâd symbolaidd i Gymru gyfan, cynrychiola’r brifddinas Gymru newydd hyderus a hyder newydd yng Nghymru”.

Canmolodd ymdrechion Caerdydd i wella bywyd ei holl bobl, a chynnwys yn ei chynllun adfywio hostel £3m i’r digartref.

“Mae’r ddinas,” meddai, “wedi ceisio codi urddas bywyd ei holl ddinasyddion trwy greu amgylchedd lle y gall pobl fyw a gweithio mewn diogelwch ... mae wedi sylweddoli os nad oes newyddion da i bawb nad oes newyddion da i neb, ac y bernir pob dinas a chymdeithas yn y pen draw yn ôl sut y maent yn trin eu dinasyddion tlotaf”.

“Yr ydym felly yn llawenhau yn y pethau da hyn a ddigwyddodd yng Nghaerdydd. Ac fel y daeth Dewi Sant i fod yn nawddsant inni, gall y ddinas hon fod yn ganolbwynt i bopeth sy’n dda yn ein bywyd cenedlaethol, heb anghofio gweddill Cymru”.

* Os dych chi`n dod i Gaerdydd ar gyfer yr orymdaith, cofiwch fod croeso i chi ymuno a chymulleidfa Eglwys Dewi Sant ar y Sul cyn Gwyl Dewi, Chwefror 28ain. Yr Esgob Wyn Evans, Esgob Tyddewi, fydd yn gweinyddu ac yn pregethu wrth i ni gadw gwyl nawddsant y plwyf. Am 10.30 mae gwasanaeth y bore, gyda`r Gosber am 6pm.

Am fwy o wybodaeth, cysylltwch ag: