GweddÏau dros Esgobaeth Bangor
Colectau ar gyfer yr Ystwyll I & II
Dad tragwyddol,
a ddatguddiaist ym medydd Iesu
ei fod yn Fab i ti,
gan ei eneinio â'r Ysbryd Gln:
ysbrydola ni
a anwyd o ddwr a'r Ysbryd,
i ildio ein bywydau i'th wasanaeth,
fel y bo i ni lawenhau o gael ein galw yn blant i Dduw;
trwy Iesu Grist ein Harglwydd. Amen.
Hollalluog Dduw,
yng Nghrist rwyt yn gwneud pob peth yn newydd:
trawsffurfia dlodi ein natur
â chyfoeth dy ras,
ac yn adnewyddiad ein bywydau
gwna'n hysbys dy iginiant nefol;
trwy Iesu Grist ein Harglwydd. Amen.
Litani gan yr Esgob Wes Frensdorff, cyn-esgob Nevada
Gadewch i ni weddïo am eglwys
lle mae pawb yn gwybod i sicrwydd fod Duw yn eu caru,
a'i fod ef yn ein hadnabod ni i gyd wrth ein henwau;
am eglwys lle mae Iesu yn wir Air Duw,
yn ffenestr i galon y Tad,
yn arwydd o obaith Duw ac o'i fwriad ar gyfer y ddynoliaeth gyfan;
am eglwys lle nad yw'r Ysbryd wedi ei gyfyngu i blaid,
ond yn wynt a thân ym mhob un,
yn harddu'r eglwys â doniau amryliw.
Arglwydd deled dy deyrnas
Gwneler dy ewyllys.
Gadewch i ni weddïo am eglwys
lle mae'r addoli yn fywiog ac yn hwyliog
yn ogystal ag yn addolgar ac yn sanctaidd;
lle mae pobl yn gwybod sut i weddïo ac yn mwynhau gwneud hynny -
yn aml ac yn gyson, ar eu pennau'u hunain ac ar y cyd,
mewn distawrwydd, mewn geiriau ac ar gân;
eglwys lle mae'r Cymun yn ganolbwynt bywyd
a gwasanaethu yn ganolbwynt cenhadu;
a'r Arglwydd y gwas yn cael ei adnabod yn nhoriad y bara.
Arglwydd deled dy deyrnas
Gwneler dy ewyllys.
Gadewch i ni weddïo am eglwys
sy'n datgan fod bywyd yn drech na marwolaeth,
lawn cymaint â bod yna fywyd wedi marwolaeth;
sy'n barod ac yn fodlon newid, heb ofni'r newid hwnnw,
sy'n medru adnabod llaw Duw yn yr aildrefnu ac yn y chwyldro,
sy'n datgan prydferthwch amrywiaeth,
sy'n casáu carchar undonedd,
sy'n gwadu bod rhwyg rhwng y secwlar a'r sanctaidd, rhwng y byd a'r eglwys,
gan mai dyma'r byd y daeth Crist iddo ac y bu farw drosto.
Arglwydd deled dy deyrnas
Gwneler dy ewyllys.
Gadewch i ni weddïo am eglwys
sydd wedi ei gwreiddio mor ddwfn yn yr efengyl a thraddodiad
fel y gall hi, fel coeden fyw,
ysgwyd yn y gwynt a'n synnu ni'n barhaus â'i blodau newydd.
Arglwydd deled dy deyrnas
Gwneler dy ewyllys.
Gadewch i ni weddïo am eglwys
lle mae pawb yn gwybod eu bod yn rhan o'r laos,
pobl sanctaidd Duw:
cymuned sydd yn gweinidogaethu yn hytrach na chymuned sydd yn llechu o gwmpas gweinidog.
Arglwydd deled dy deyrnas
Gwneler dy ewyllys.
Gadewch i ni weddïo am eglwys
o dangnefeddwyr a iachawyr sydd yn ymboeni cymaint am iacháu cymdeithas ag am iacháu unigolion;
am gyfiawnder lawn cymaint â rhyddid;
sy'n wynebu'n broffwydol wreiddiau anghyfiawnder
cymdeithasol, gwleidyddol ac economaidd.
Arglwydd deled dy deyrnas
Gwneler dy ewyllys.
Yn olaf, gadewch i ni weddïo am eglwys
sydd yn deulu'r ffydd, sydd yn agored i'w gilydd,
yn gofalu am ei gilydd ac yn rhannu â'i gilydd;
lle mae pawb yn cael eu cofleidio, eu derbyn a'u cadarnhau;
cymuned o dan farn
sydd yn ceisio byw gyda'r hyn y mae'n ei gyhoeddi,
ac sydd felly'n gwir garu'r hyn y mae'r Arglwydd yn ei orchymyn
ac yn chwennych ei addewid.
Arglwydd deled dy deyrnas
Gwneler dy ewyllys.
Am bopeth y gall Duw ei wneud ynom ni;
am bopeth y gall Duw ei wneud hebom ni:
Diolch a fo i Dduw.
Am bawb y bu Duw fyw ynddynt o'n blaen ni ;
am bawb y mae Crist yn byw ynddynt ochr yn ochr â ni:
Diolch a fo i Dduw.
Am bob peth y mae'r Ysbryd am ei roi i ni;
am y mannau hynny y mae'r Ysbryd am ein hanfon ni iddynt:
Diolch a fo i Dduw. Amen.
Gweddi Esgobaeth Bangor, Dathlu 1450 Mlynedd, Pentecost 1996
Dduw ein Tad, clywsom am rym dy ras yn nyddiau Deiniol
ac yn oes y Saint,
pan ddygwyd dy bobl di a oedd yn bell i ffwrdd atat ti yn Iesu Grist.
O Arglwydd adfywia dy waith yn ein cyfnod ninnau,
adnewydda ynom ffydd, gobaith a chariad,
a chaniatâ y gwreiddir yr hyn yr ydym a'r hyn a wnawn
mewn addoliad cyson a bywiol.
Tyrd Ysbryd Glân o'r pedwar gwynt,
anadla ar esgyrn sychion ein crefydd,
ysbrydola ni i ddisgwyl ac i fentro gwneud pethau mawr yn ein dydd
a llunia ni o'r newydd i fod yn dystion gwir a pharod
i Efengyl ogoneddus ein Harglwydd a'n Gwaredwr Iesu Grist.
Amen.
Arglwydd helpa ni i newid,
i newid ein hunain, ac i newid ein byd;
i fod yn ymwybodol bod angen newid, i ddelio gyda'r boen o newid, i deimlo'r llawenydd o newid;
i ymgymryd â'r daith heb amgyffred y pen draw,
cyfrinach chwyldro graddol. Amen.
- Michael Leunig
Dragwyddol Dduw, mynegaist yng Nghrist
gyflawnder dy bwrpas cariadus.
Bydded i ni fyw trwy ffydd, gerdded mewn gobaith a chael ein hadnewyddu mewn cariad,
nes bod y byd yn adlewyrchu dy ogoniant ac y byddi di'n oll yn oll.
Bydded felly, Tyrd Arglwydd Iesu! Amen.